1Th 3 | YML | STEP | Tutuya manamanawena kebu maigimi 'a da 'ise'isedi wata valami 'a da noganogai begaidi 'a vevenuafouviga faifaimi. 'A nuani yau wata Sailasa 'ama 'ailuga 'a na miamia 'atamana Adeni, we'e Timoti 'a voneni i wai 'waimie. Taunina iada 'ama 'aila'a, ma fuemeye Yaubada faifaina 'a folofolova Keliso Valana 'Atumaina 'a lalau'age-vuvua. 'A vetuneiga i na 'ivaisemi yami vetumagana i na kiavetoketokedi bega tutuyanina vita 'wa na veluagadiga, kebu tamu aitoi 'waimiega Iesu i na baileni i na vilai yana sauluva tuatuaina 'waineye. 'Omi 'akonadi 'wa 'asetai Yaubada vita i tauyedi i na souyedi 'waideye.

1 Thessalonians 3

Faulo Timoti i vetunei nuanuana me Tesalonaika yadi mia i na 'asetai.

1 Tutuya manamanawena kebu maigimi 'a da 'ise'isedi wata valami 'a da noganogai begaidi 'a vevenuafouviga faifaimi. 'A nuani yau wata Sailasa 'ama 'ailuga 'a na miamia 'atamana Adeni, we'e Timoti 'a voneni i wai 'waimie. Taunina iada 'ama 'aila'a, ma fuemeye Yaubada faifaina 'a folofolova Keliso Valana 'Atumaina 'a lalau'age-vuvua. 'A vetuneiga i na 'ivaisemi yami vetumagana i na kiavetoketokedi bega tutuyanina vita 'wa na veluagadiga, kebu tamu aitoi 'waimiega Iesu i na baileni i na vilai yana sauluva tuatuaina 'waineye. 'Omi 'akonadi 'wa 'asetai Yaubada vita i tauyedi i na souyedi 'waideye. 4 'Wa 'asetaiga fai tutuyanina taiadi ta miamiani 'a vona-vagasemi 'a vo, 'Awaie Keliso 'ana tovedumwe'ai'ai i na vegavieda vita ta na veluagadi,” ava'ai a voneyeniga 'ana mogitana i sousouyeni 'waimie, 'wa 'isenina nika 'wa nuani. 5 Fai a 'asetai vita 'wa veveluagadi a venuafouviga bwaikina faifaimi, begaidi Timoti a vetunei i wai 'waimie yami vetumagana i na 'iseni toketokena 'alo i mwea bega i na mai i na lu'ivona 'waikuye. A kololo i na nunago Seitani 'eba sailubu bwaikina i na velemi 'wa na be'u bega basenadi yama folova 'waimie i na 'ivesakoi.

S1 Fol 17:15S2-3 Fol 16:1 2 Tim 3:12S4 Fol 14:22
S5 Fil 2:16

Timoti yana lu'ivona me Tesalonaika faifaidi.

6 Side bani'odi, ma yaku venuafouviga Timoti a vetunei i wai taiadi 'wa miamia, tutuyanina i vilai i mai valami i lu'ivoneyeni a sosoana fai i vo, Me Tesalonaika yadi sauluva a 'iseni, i vevetumagana mogitana Keliso 'waineye wata taunidi tonuakalikali. Tutuya fuedi ma yadi sosoana i nuanuanida nuanuadi bwaikina ta na foge-vaituganidi, bani'odi i nuanuayediga 'ida wata yada nuanua i vesala.”

7 Emavo, 'ima vita wata veviga 'a veveluagadi siwe valami 'a nogai, mogitana i kiavesosoanima. 8 Yami vetumagananina valana faifaina nuafouma i vatu wata yama mia i ve'atumai fai 'wa tovotovoi fa'alina wata 'wa vevesauluva 'atumaina 'Auvea yana nuanua bani'odi. 9 'Asiau 'ama fata 'a na vekaiwa Yaubada 'waineye faifaimi. 'A sosoanemi bwaikina begaidi Yaubada mataneye 'a vevekaiwa. 10 'Aiata wata lovana 'a vevelu'ui nuanuama bwaikina tauniotogimi 'a na 'isemi bega yami vetumagana Keliso 'waineye 'a na 'imoso'iedi.

11 A vevelu'ui nuanuaku yada Yaubada Tamada tauniotogina wata 'ada Toveimea Iesu yama 'eda i na 'idewai 'a na wai 'waimie. 12 Wata nuanuaku i na 'ivaisemi yami nuakalikali emiavo wata tomotoga 'ifwaidi faifaidi i na vebwaika-'afo'afo, yama nuakalikali 'waimie 'ana fata bani'odi. 13 I na 'ivaisemi 'wa na vetoketoke bega tutuyanina 'ada Toveimea Iesu i na vila-vaitugani yana tomotoga matatabudi taiadi, yami sauluva 'atumai'avadi wata magemagetadi 'wa na tovoi yada Yaubada Tamada mataneye.

S6 Fol 18:5S13 Fil 1:9-10